ربط شیشہ سے تعلق ہے نہ کچھ جام کے ساتھ

ربط شیشہ سے تعلق ہے نہ کچھ جام کے ساتھ

نسبتیں جب سے ہوئیں دل کو ترے نام کے ساتھ

زندگی اجنبی جذبات کا اک سنگم ہے

کیف آغاز بھی ہے حسرت انجام کے ساتھ

جام و مینا سے الگ اس میں ہے اک کیف و سرور

آؤ کچھ دور چلیں گردش ایام کے ساتھ

زندگی میں بڑے مفہوم نظر آئیں گے

چند لمحے تو گزارو کسی ناکام کے ساتھ

شاعری آئنۂ زیست میں خود بینی ہے

اپنی اک راہ الگ ہے روش عام کے ساتھ

چارہ سازوں کا نہ ہونا بڑی نعمت ہے شفیقؔ

رنج و غم ہم نے اٹھائے بڑے آرام کے ساتھ