rache-base hue lamhon se jab hisab hua

rache-base hue lamhoñ se jab hisāb huā

ga.e dinoñ kī rutoñ kā ziyāñ savāb huā

guzar gayā to pas-e-mauj be-kanārī thī

Thahar gayā to vo dariyā mujhe sarāb huā

supurdagī ke taqāze kahāñ kahāñ se paḌhūñ

hunar ke baab meñ paikar tirā kitāb huā

har aarzū mirī āñkhoñ kī raushnī Thahrī

charāġh soch meñ gum haiñ ye kyā azaab huā

kuchh ajnabī se lage āshnā darīche bhī

kiran kiran jo ujāloñ kā ehtisāb huā

vo yaḳh-mizāj rahā fāsloñ ke rishtoñ se

magar gale se lagāyā to aab aab huā

vo peḌ jis ke tale ruuh gungunātī thī

usī kī chhāñv se ab mujh ko ijtināb huā

in āñdhiyoñ meñ kise mohlat-e-qayām yahāñ

ki ek ḳhema-e-jāñ thā so be-tanāb huā

salīb-e-sañg ho yā pairahan ke rañg 'nasīr'

hamāre naam se kyā kyā na intisāb huā

rache-base hue lamhon se jab hisab hua

gae dinon ki ruton ka ziyan sawab hua

guzar gaya to pas-e-mauj be-kanari thi

Thahar gaya to wo dariya mujhe sarab hua

supurdagi ke taqaze kahan kahan se paDhun

hunar ke bab mein paikar tera kitab hua

har aarzu meri aankhon ki raushni Thahri

charagh soch mein gum hain ye kya azab hua

kuchh ajnabi se lage aashna dariche bhi

kiran kiran jo ujalon ka ehtisab hua

wo yaKH-mizaj raha faslon ke rishton se

magar gale se lagaya to aab aab hua

wo peD jis ke tale ruh gungunati thi

usi ki chhanw se ab mujh ko ijtinab hua

in aandhiyon mein kise mohlat-e-qayam yahan

ki ek KHema-e-jaan tha so be-tanab hua

salib-e-sang ho ya pairahan ke rang 'nasir'

hamare nam se kya kya na intisab hua