rafaqaton ke safar mein gurez-pa sa laga

rafāqatoñ ke safar meñ gurez-pā sā lagā

vo bevafā na sahī phir bhī bevafā sā lagā

na-jāne kaisī udāsī dil-e-tabāh meñ thī

jo us pe zaḳhm kī sūrat tirā dilāsā lagā

vo jis kī zinda-dilī ke hazār charche the

vo terī bazm meñ kitnā bujhā bujhā sā lagā

ye nā-rasā.ī bhī kitnī ajiib hotī hai

samundaroñ kā musāfir thā aur pyāsā lagā

bas ek lamha-e-ruḳhsat ke phail jaane se

maiñ apne aap ko kitnā thakā thakā sā lagā

'nazīr' tark-e-ta.alluq pe dukh na thā lekin

mujhe kisī kā ravayya zarā burā sā lagā

rafaqaton ke safar mein gurez-pa sa laga

wo bewafa na sahi phir bhi bewafa sa laga

na-jaane kaisi udasi dil-e-tabah mein thi

jo us pe zaKHm ki surat tera dilasa laga

wo jis ki zinda-dili ke hazar charche the

wo teri bazm mein kitna bujha bujha sa laga

ye na-rasai bhi kitni ajib hoti hai

samundaron ka musafir tha aur pyasa laga

bas ek lamha-e-ruKHsat ke phail jaane se

main apne aap ko kitna thaka thaka sa laga

'nazir' tark-e-talluq pe dukh na tha lekin

mujhe kisi ka rawayya zara bura sa laga