رفاقتوں کے سفر میں گریز پا سا لگا

رفاقتوں کے سفر میں گریز پا سا لگا

وہ بے وفا نہ سہی پھر بھی بے وفا سا لگا

نہ جانے کیسی اداسی دل تباہ میں تھی

جو اس پہ زخم کی صورت ترا دلاسا لگا

وہ جس کی زندہ دلی کے ہزار چرچے تھے

وہ تیری بزم میں کتنا بجھا بجھا سا لگا

یہ نارسائی بھی کتنی عجیب ہوتی ہے

سمندروں کا مسافر تھا اور پیاسا لگا

بس ایک لمحۂ رخصت کے پھیل جانے سے

میں اپنے آپ کو کتنا تھکا تھکا سا لگا

نظیرؔ ترک تعلق پہ دکھ نہ تھا لیکن

مجھے کسی کا رویہ ذرا برا سا لگا