rafiq-o-monis-o-hamdam koi mila hi nahin

rafīq-o-monis-o-hamdam koī milā hī nahīñ

vo kyā jiye jise jiine kā aasrā hī nahīñ

use haqīqat-e-uzmā samajh ke itrā.e

vo naqsh-e-zīst jo sach pūchhiye banā hī nahīñ

ḳhudā ke vāste kuchh raushnī ghaTā diije

nazar hai ḳhīra kuchh aisī ki sūjhtā hī nahīñ

havās-o-hosh-o-ḳhirad sab vahāñ salāmat haiñ

jahāñ nigāh kā jaadū kabhī chalā hī nahīñ

vo apnī zaat se bāhar nikal ke kyā jaa.e

vo dīda-var jo kisī samt dekhtā hī nahīñ

tirī nigāh ke sadqe tirī nazar ke nisār

girā jo terī nazar se vo phir uThā hī nahīñ

us ek baat ke qurbān jā.iye ki jise

tamām umr kahā aur kuchh kahā hī nahīñ

fasāna-e-dil-e-sad-chāk kā ma.aal na pūchh

sunā to us ne magar jaise kuchh sunā hī nahīñ

dikhā.ūñ bhī to kise dard-o-ranj kī tasvīr

mire jahāñ meñ koī dard-āshnā hī nahīñ

mire rafīq mujhe dars-e-maslahat kyoñ deñ

diloñ kī baat hai yaañ maslahat ravā hī nahīñ

zamāna us se ḳhushī kyoñ talab kare 'qādir'

jise ġhamoñ ke sivā aur kuchh milā hī nahīñ

rafiq-o-monis-o-hamdam koi mila hi nahin

wo kya jiye jise jine ka aasra hi nahin

use haqiqat-e-uzma samajh ke itrae

wo naqsh-e-zist jo sach puchhiye bana hi nahin

KHuda ke waste kuchh raushni ghaTa dije

nazar hai KHira kuchh aisi ki sujhta hi nahin

hawas-o-hosh-o-KHirad sab wahan salamat hain

jahan nigah ka jadu kabhi chala hi nahin

wo apni zat se bahar nikal ke kya jae

wo dida-war jo kisi samt dekhta hi nahin

teri nigah ke sadqe teri nazar ke nisar

gira jo teri nazar se wo phir uTha hi nahin

us ek baat ke qurban jaiye ki jise

tamam umr kaha aur kuchh kaha hi nahin

fasana-e-dil-e-sad-chaak ka maal na puchh

suna to us ne magar jaise kuchh suna hi nahin

dikhaun bhi to kise dard-o-ranj ki taswir

mere jahan mein koi dard-ashna hi nahin

mere rafiq mujhe dars-e-maslahat kyon den

dilon ki baat hai yan maslahat rawa hi nahin

zamana us se KHushi kyon talab kare 'qadir'

jise ghamon ke siwa aur kuchh mila hi nahin