rafiqon ko madad karne pukara hum nahin karte

rafīqoñ ko madad karne pukārā ham nahīñ karte

ḳhudā kaafī hai bandoñ kā sahārā ham nahīñ karte

zabāñ ye haq kī aadī hai kisī se Dar nahīñ saktī

sabhī kuchh khul ke kahte haiñ ishāra ham nahīñ karte

samundar meñ utar ke ruḳh havā kā moḌ dete haiñ

kabhī sāhil se tūfāñ kā nazāra ham nahīñ karte

ye ḳhuddārī hamārī ham ko apnī jaañ se pyārī hai

jhukā ke sar ko TukḌoñ par guzārā ham nahīñ karte

sabaq lete haiñ ham apnī ḳhatā se ilm paate haiñ

ḳhatā jo ham se ho jaa.e dobāra ham nahīñ karte

baḌī mushkil se sīkhā hai sabaq ham ne siyāsat kā

tujhe qadmoñ meñ rakhte haiñ sitāra ham nahīñ karte

hamārī jeb ḳhālī hai to kyā ye dil hai shāhoñ kā

faqīrī meñ bhī muflis se kināra ham nahīñ karte

ye mumkin hai ki kuchh kaḌvī lageñ 'shamsher' kī bāteñ

khare alfāz likhte haiñ ye aarā ham nahīñ karte

rafiqon ko madad karne pukara hum nahin karte

KHuda kafi hai bandon ka sahaara hum nahin karte

zaban ye haq ki aadi hai kisi se Dar nahin sakti

sabhi kuchh khul ke kahte hain ishaara hum nahin karte

samundar mein utar ke ruKH hawa ka moD dete hain

kabhi sahil se tufan ka nazara hum nahin karte

ye KHuddari hamari hum ko apni jaan se pyari hai

jhuka ke sar ko TukDon par guzara hum nahin karte

sabaq lete hain hum apni KHata se ilm pate hain

KHata jo hum se ho jae dobara hum nahin karte

baDi mushkil se sikha hai sabaq hum ne siyasat ka

tujhe qadmon mein rakhte hain sitara hum nahin karte

hamari jeb KHali hai to kya ye dil hai shahon ka

faqiri mein bhi muflis se kinara hum nahin karte

ye mumkin hai ki kuchh kaDwi lagen 'shamsher' ki baaten

khare alfaz likhte hain ye aara hum nahin karte