raft o aamad bana raha hun main

raft o aamad banā rahā huuñ maiñ

rāh-e-maqsad banā rahā huuñ maiñ

kaam meñ lā ke kuchh ḳhas-o-ḳhāshāk

apnī masnad banā rahā huuñ maiñ

zindagī jurm to nahīñ lekin

ho ke sarzad banā rahā huuñ maiñ

yūñhī bekār maiñ paḌā ḳhud ko

kār-āmad banā rahā huuñ maiñ

goyā apnī hudūd se baḌh kar

apnī sarhad banā rahā huuñ maiñ

kar rahā huuñ hayāt-e-nau ta.amīr

apnā marqad banā rahā huuñ maiñ

de rahā huuñ jilā sharāroñ ko

ḳhud ko mūbad banā rahā huuñ maiñ

maah kī aaj phir gahan ban kar

tāb-e-asvad banā rahā huuñ maiñ

munharif ho ke us kī chāhat se

ḳhud ko murtad banā rahā huuñ maiñ

vo ki ban pā nahīñ rahā mujh se

jo ki shāyad banā rahā huuñ maiñ

ug rahā huuñ maiñ aur saath apne

sar pe bargad banā rahā huuñ maiñ

raft o aamad bana raha hun main

rah-e-maqsad bana raha hun main

kaam mein la ke kuchh KHas-o-KHashak

apni masnad bana raha hun main

zindagi jurm to nahin lekin

ho ke sarzad bana raha hun main

yunhi bekar main paDa KHud ko

kar-amad bana raha hun main

goya apni hudud se baDh kar

apni sarhad bana raha hun main

kar raha hun hayat-e-nau tamir

apna marqad bana raha hun main

de raha hun jila shararon ko

KHud ko mubad bana raha hun main

mah ki aaj phir gahan ban kar

tab-e-aswad bana raha hun main

munharif ho ke us ki chahat se

KHud ko murtad bana raha hun main

wo ki ban pa nahin raha mujh se

jo ki shayad bana raha hun main

ug raha hun main aur sath apne

sar pe bargad bana raha hun main