rafta rafta aasman utra zamin ke us taraf

rafta rafta āsmāñ utrā zamīñ ke us taraf

maiñ ne boyā thā kabhī sabza zamīñ ke us taraf

is zamīñ par pyaas kī shiddat huī thī kab ayaañ

kis ne sochā thā nihāñ dariyā zamīñ ke us taraf

āsmāñ ke rañg saare hairatoñ ke aks haiñ

vo hai ik chehra pas-e-parda zamīñ ke us taraf

mere hone kā gumāñ is bhiiḌ meñ hai mubtalā

aur maiñ tanhā bahut tanhā zamīñ ke us taraf

ek taara TūTne kī chaah meñ bechain hai

muntazir hogā koī bachcha zamīñ ke us taraf

rafta rafta aasman utra zamin ke us taraf

main ne boya tha kabhi sabza zamin ke us taraf

is zamin par pyas ki shiddat hui thi kab ayan

kis ne socha tha nihan dariya zamin ke us taraf

aasman ke rang sare hairaton ke aks hain

wo hai ek chehra pas-e-parda zamin ke us taraf

mere hone ka guman is bhiD mein hai mubtala

aur main tanha bahut tanha zamin ke us taraf

ek tara TuTne ki chah mein bechain hai

muntazir hoga koi bachcha zamin ke us taraf