rafta-rafta baat banegi husn qayamat Dhaega

rafta-rafta baat banegī husn qayāmat Dhā.egā

'ishq vafā ke naġhme gā kar apnā rang jamā.egā

ye duniyā hai is duniyā ke baaġh kī riit nirālī hai

phuul khilegā ḳhushbū degā TūTegā murjhā.egā

shahr-e-vafā ke vīrāne meñ dard ko duniyā tarsegī

dil kī mujh ko fikr nahīñ hai dil to bahal hī jā.egā

jaan ga.ī ab duniyā saarī insānī hamdardī meñ

jo insāf kī raah chalegā mushkil meñ paḌ jā.egā

ham kyā jāneñ ham se pahle bhī ye hotā aaya hai

jo bhī sachchī baat kahegā dīvāna kahlā.egā

ham ne bhī to Thokar khā kar baḌe baḌe dukh paa.e haiñ

ab to sīdhī raah chaleñge jo ho dekhā jā.egā

ḳhuun bahegā dil taḌpeñge be-sar lāsheñ ghūmeñgī

ye merā īmān hai 'zaidī' amn yahāñ bhī āye.gā

rafta-rafta baat banegi husn qayamat Dhaega

'ishq wafa ke naghme ga kar apna rang jamaega

ye duniya hai is duniya ke bagh ki rit nirali hai

phul khilega KHushbu dega TuTega murjhaega

shahr-e-wafa ke virane mein dard ko duniya tarsegi

dil ki mujh ko fikr nahin hai dil to bahal hi jaega

jaan gai ab duniya sari insani hamdardi mein

jo insaf ki rah chalega mushkil mein paD jaega

hum kya jaanen hum se pahle bhi ye hota aaya hai

jo bhi sachchi baat kahega diwana kahlaega

hum ne bhi to Thokar kha kar baDe baDe dukh pae hain

ab to sidhi rah chalenge jo ho dekha jaega

KHun bahega dil taDpenge be-sar lashen ghumengi

ye mera iman hai 'zaidi' amn yahan bhi aayega