rafta rafta dard-e-dil yun kam ho jata hai

rafta rafta dard-e-dil yuuñ kam ho jaatā hai

merā ġham us kī ḳhushiyoñ meñ zam ho jaatā hai

sāñsoñ kā sāñsoñ se jab sañgam ho jaatā hai

resha resha ruuh kā tab resham ho jaatā hai

koī kashish hai us kī bātoñ meñ bartāo meñ

us ke aage har chehra mub.ham ho jaatā hai

yahī soch kar tum dil kī rakhvālī karnā dost

kaḌī dhuup meñ ye kāġhaz bhī nam ho jaatā hai

jaane kaise merā qad auroñ kī nazroñ meñ

kabhī ziyāda aur kabhī kuchh kam ho jaatā hai

saath nibhāne kī Thānī hai to ye bhī sun lo

in rāhoñ meñ saaya bhī barham ho jaatā hai

jism thakā-māñda ho lekin ghar tak aate hī

ik ma.asūm hañsī se tāza-dam ho jaatā hai

rafta rafta dard-e-dil yun kam ho jata hai

mera gham us ki KHushiyon mein zam ho jata hai

sanson ka sanson se jab sangam ho jata hai

resha resha ruh ka tab resham ho jata hai

koi kashish hai us ki baaton mein bartao mein

us ke aage har chehra mubham ho jata hai

yahi soch kar tum dil ki rakhwali karna dost

kaDi dhup mein ye kaghaz bhi nam ho jata hai

jaane kaise mera qad auron ki nazron mein

kabhi ziyaada aur kabhi kuchh kam ho jata hai

sath nibhane ki Thani hai to ye bhi sun lo

in rahon mein saya bhi barham ho jata hai

jism thaka-manda ho lekin ghar tak aate hi

ek masum hansi se taza-dam ho jata hai