rafta-rafta dil par us kafir ka qabza ho gaya

rafta-rafta dil par us kāfir kā qabza ho gayā

dekhte hī dekhte ka.aba kalīsā ho gayā

kushta-e-andāz kī turbat ko Thukrā kar kahā

hausla ab to shahīd-e-nāz puurā ho gayā

hai bajā utre jo gardūñ se balāoñ par balā

dil asīr-e-halqa-e-zulf-e-chalīpā ho gayā

kyoñ na deñ ahl-e-basīrat dil ko āñkhoñ meñ jagah

gardish-e-chashm-e-tavangar se ye surma ho gayā

kyā karegā aur dast-e-nā-umīdī mere saath

TukḌe TukḌe ab to dāmān-e-tamanna ho gayā

vā.e-qismat yaad kab aaya nishān-e-kū-e-dost

qāsid-e-gum-karda-manzil jab ravāna ho gayā

hāl-e-dil kyā pūchhte ho merī sūrat dekh lo

āshnā nā-āshnā haiñ ye to naqsha ho gayā

uf re zālim aaj tak niklā na koī hausla

dil hī zaḳhmī ho gayā chhalnī kaleja ho gayā

pā-e-nāzuk meñ vahāñ us shoḳh ne haldī malī

aur shab-e-va.ada yahāñ ḳhūn-e-tamannā ho gayā

bāñdh kar tār-e-nazar meñ laa.e mazmūn-e-kamar

ġhul paḌā mulk-e-suḳhan meñ said anqā ho gayā

zulf bikhrā.e hue qātil hai zeb-e-bām aaj

dil kī barbādī kā kul sāmān puurā ho gayā

ḳhalvat-e-dil meñ nazar aane lagā vo bahr-e-husn

is qadar phailā hai ye qatra ki dariyā ho gayā

chashm-e-ahl-e-shauq rahtī hai usī jānib 'tabīb'

husn us ḳhurshīd-paikar kā tamāshā ho gayā

rafta-rafta dil par us kafir ka qabza ho gaya

dekhte hi dekhte kaba kalisa ho gaya

kushta-e-andaz ki turbat ko Thukra kar kaha

hausla ab to shahid-e-naz pura ho gaya

hai baja utre jo gardun se balaon par bala

dil asir-e-halqa-e-zulf-e-chalipa ho gaya

kyon na den ahl-e-basirat dil ko aankhon mein jagah

gardish-e-chashm-e-tawangar se ye surma ho gaya

kya karega aur dast-e-na-umidi mere sath

TukDe TukDe ab to daman-e-tamanna ho gaya

wae-qismat yaad kab aaya nishan-e-ku-e-dost

qasid-e-gum-karda-manzil jab rawana ho gaya

haal-e-dil kya puchhte ho meri surat dekh lo

aashna na-ashna hain ye to naqsha ho gaya

uf re zalim aaj tak nikla na koi hausla

dil hi zaKHmi ho gaya chhalni kaleja ho gaya

pa-e-nazuk mein wahan us shoKH ne haldi mali

aur shab-e-wada yahan KHun-e-tamanna ho gaya

bandh kar tar-e-nazar mein lae mazmun-e-kamar

ghul paDa mulk-e-suKHan mein said anqa ho gaya

zulf bikhrae hue qatil hai zeb-e-baam aaj

dil ki barbaadi ka kul saman pura ho gaya

KHalwat-e-dil mein nazar aane laga wo bahr-e-husn

is qadar phaila hai ye qatra ki dariya ho gaya

chashm-e-ahl-e-shauq rahti hai usi jaanib 'tabib'

husn us KHurshid-paikar ka tamasha ho gaya