رفوگروں میں اسے کون اب شمار کرے

رفوگروں میں اسے کون اب شمار کرے

رگوں کی سرخ قبائیں جو تار تار کرے

انہیں سے فصل نمک داں اگائی جائے گی

نئی صدی نئے زخموں کا اعتبار کرے

خدا پہ چھوڑ دے کشتی یہ اس کی مرضی ہے

ندی میں غرق کرے یا ندی کے پار کرے

ضعیف باپ کو کاندھے پہ لے کے چلتا ہے

مرا خدا مرے بچے کو شہسوار کرے

یہ پتھروں سے بنا ہے یہ دیکھتے رہنا

یہ دیوتا کسی انسان پر نہ وار کرے

ابھی میں فاقہ کشی کے محاذ جنگ پہ ہوں

مری غزل سے کہو میرا انتظار کرے

میں دوستی کی اسی حد میں پھر کھڑا ہوں ریاضؔ

ابو ظفر کو جو دلی سے بے دیار کرے