rafugaron mein use kaun ab shumar kare

rafūgaroñ meñ use kaun ab shumār kare

ragoñ kī surḳh qabā.eñ jo taar taar kare

inhīñ se fasl-e-namakdāñ ugaa.ī jā.egī

na.ī sadī na.e zaḳhmoñ kā e.atibār kare

ḳhudā pe chhoḌ de kashtī ye us kī marzī hai

nadī meñ ġharq kare yā nadī ke paar kare

za.iif baap ko kāñdhe pe le ke chaltā hai

mirā ḳhudā mire bachche ko shahsavār kare

ye pattharoñ se banā hai ye dekhte rahnā

ye devtā kisī insān par na vaar kare

abhī maiñ fāqa-kashī ke mahāz-e-jang pe huuñ

mirī ġhazal se kaho merā intizār kare

maiñ dostī kī usī had meñ phir khaḌā huuñ 'riyāz'

abū-zafar ko jo dillī se be-dayār kare

rafugaron mein use kaun ab shumar kare

ragon ki surKH qabaen jo tar tar kare

inhin se fasl-e-namakdan ugai jaegi

nai sadi nae zaKHmon ka eatibar kare

KHuda pe chhoD de kashti ye us ki marzi hai

nadi mein gharq kare ya nadi ke par kare

zaif bap ko kandhe pe le ke chalta hai

mera KHuda mere bachche ko shahsawar kare

ye pattharon se bana hai ye dekhte rahna

ye dewta kisi insan par na war kare

abhi main faqa-kashi ke mahaz-e-jang pe hun

meri ghazal se kaho mera intizar kare

main dosti ki usi had mein phir khaDa hun 'riyaz'

abu-zafar ko jo dilli se be-dayar kare