rag rag mein tere hijr ko bharna paDa mujhe

rag rag meñ tere hijr ko bharnā paḌā mujhe

tere liye ye kaam bhī karnā paḌā mujhe

tishna-labī thī aur samundar meñ zahr thā

thoḌā sā jiine ke liye marnā paḌā mujhe

tanhā ye tīrgī se bhalā kaise jīt.tā

sūraj ke saath saath ubharnā paḌā mujhe

maiñ aap apnā bojh thā apne hī aap par

so apne aap se hī utarnā paḌā mujhe

haa.e jo mere naam se mansūb thī galī

chup-chāp usī galī se guzarnā paḌā mujhe

aisī adā se us ne sameTā thā ek baar

phir ḳhud meñ baar baar bikharnā paḌā mujhe

rag rag mein tere hijr ko bharna paDa mujhe

tere liye ye kaam bhi karna paDa mujhe

tishna-labi thi aur samundar mein zahr tha

thoDa sa jine ke liye marna paDa mujhe

tanha ye tirgi se bhala kaise jitta

suraj ke sath sath ubharna paDa mujhe

main aap apna bojh tha apne hi aap par

so apne aap se hi utarna paDa mujhe

hae jo mere nam se mansub thi gali

chup-chap usi gali se guzarna paDa mujhe

aisi ada se us ne sameTa tha ek bar

phir KHud mein bar bar bikharna paDa mujhe