رہ ہستی میں اک ایسا بھی مقام آتا ہے

رہ ہستی میں اک ایسا بھی مقام آتا ہے

بے ارادہ ہی زباں پر کوئی نام آتا ہے

دل سمجھ کر میں اٹھا لیتا ہوں ریزہ ریزہ

ٹوٹ جاتا ہے جو ساغر مرے کام آتا ہے

روز کچھ شغل نکل آتا ہے دیوانے کا

روز کچھ کوئے ملامت سے پیام آتا ہے

پا بہ زنجیر سہی آبلہ پائی کا جنوں

ہر نفس تذکرۂ منزل و گام آتا ہے

فاش جب ہوتا ہے راز ہنر صیادی

اک نیا سلسلۂ دانہ و دام آتا ہے

دل مچل جاتا ہے اک شاہد‌ محمل کے لیے

حسن بے باک تو اکثر لب بام آتا ہے