rah-e-KHulus mein behtar hai sar jhuka rakhna

rah-e-ḳhulūs meñ behtar hai sar jhukā rakhnā

vo sar-kashīda agar hai to sar sivā rakhnā

yahī vo soch hai jis kī talāsh thī mujh ko

ye baat apne ḳhayāloñ se ab judā rakhnā

na qurb-e-zāt hī hāsil na zaḳhm-e-rusvā.ī

ajiib lagtā hai ab ḳhud se rābta rakhnā

tamām shahr ko ātish-kada banānā hai

diloñ kī aag salīqe se jā-ba-jā rakhnā

baḌā ajiib hai tahzīb-e-irteqā ke liye

tamām umr kisī ik ko ham-navā rakhnā

kamāl-e-hirs hai jazb-o-talab kī duniyā meñ

badan ko ruuh kī āvāz se judā rakhnā

buland kar ke zarā hausloñ kī dīvāreñ

diyā jalā ke havā ko charāġh-pā rakhnā

shikast-o-reḳht kī duniyā meñ zinda rahne kī

bikhar bikhar ke simaTne kā hausla rakhnā

ḳhud apnī zaat pe tanqīd ke murādif hai

kisī ke sāmne dānista ā.īna rakhnā

jise milī hai ye daulat vahī samajhtā hai

ajiib nemat-e-uzmā hai dil dukhā rakhnā

ho jab bhī jaanā kisī ke nigār-ḳhāne meñ

'nazar' ḳhayāl zarā ḳhadd-o-ḳhāl kā rakhnā

rah-e-KHulus mein behtar hai sar jhuka rakhna

wo sar-kashida agar hai to sar siwa rakhna

yahi wo soch hai jis ki talash thi mujh ko

ye baat apne KHayalon se ab juda rakhna

na qurb-e-zat hi hasil na zaKHm-e-ruswai

ajib lagta hai ab KHud se rabta rakhna

tamam shahr ko aatish-kada banana hai

dilon ki aag saliqe se ja-ba-ja rakhna

baDa ajib hai tahzib-e-irteqa ke liye

tamam umr kisi ek ko ham-nawa rakhna

kamal-e-hirs hai jazb-o-talab ki duniya mein

badan ko ruh ki aawaz se juda rakhna

buland kar ke zara hauslon ki diwaren

diya jala ke hawa ko charagh-pa rakhna

shikast-o-reKHt ki duniya mein zinda rahne ki

bikhar bikhar ke simaTne ka hausla rakhna

KHud apni zat pe tanqid ke muradif hai

kisi ke samne danista aaina rakhna

jise mili hai ye daulat wahi samajhta hai

ajib nemat-e-uzma hai dil dukha rakhna

ho jab bhi jaana kisi ke nigar-KHane mein

'nazar' KHayal zara KHadd-o-KHal ka rakhna