رہ منزل قافلہ منتظر ہے

رہ منزل قافلہ منتظر ہے

سفر کے لیے راستہ منتظر ہے

ہے نزدیک منزل تو قدموں سے میرے

لپٹنے کو ہر آبلہ منتظر ہے

تم آ کر سنوارو یہ ویران گلشن

تمہاری ہی خاطر صبا منتظر ہے

بدن کی شعاعوں میں ایسی ہے خوشبو

کہ ہر گل ترے ربط کا منتظر ہے

کبھی مجھ سے ملنے تو ساحل پہ آ جا

سمندر تری دید کا منتظر ہے

نصیبوں سے ملتا ہے ریشم کا پھندا

سزا کے لیے اک خطا منتظر ہے

کہو آندھیوں سے کہ آ کر بجھائیں

فنا کے لیے خود دیا منتظر ہے

یوں غم میرے دامن سے لپٹے ہوئے ہیں

گیا ایک تو دوسرا منتظر ہے

سر آئنہ میں کھڑا سوچتا ہوں

کوئی تو پس آئنہ منتظر ہے

فقط اک یہی بات کہنی ہے ہم کو

کہ برسوں سے سنتؔ آپ کا منتظر ہے