rah-e-manzil-e-qafila muntazir hai

rah-e-manzil-e-qāfila muntazir hai

safar ke liye rāsta muntazir hai

hai nazdīk manzil to qadmoñ se mere

lipaTne ko har aabla muntazir hai

tum aa kar sañvāro ye vīrān gulshan

tumhārī hī ḳhātir sabā muntazir hai

badan kī shuāoñ meñ aisī hai ḳhushbū

ki har gul tire rabt kā muntazir hai

kabhī mujh se milne tū sāhil pe aa jā

samundar tirī diid kā muntazir hai

nasīboñ se miltā hai resham kā phandā

sazā ke liye ik ḳhatā muntazir hai

kaho āñdhiyoñ se ki aa kar bujhā.eñ

fanā ke liye ḳhud diyā muntazir hai

yuuñ ġham mere dāman se lipTe hue haiñ

gayā ek to dūsrā muntazir hai

sar-e-ā.ina maiñ khaḌā sochtā huuñ

koī to pas-e-ā.ina muntazir hai

faqat ik yahī baat kahnī hai ham ko

ki barsoñ se 'sant' aap kā muntazir hai

rah-e-manzil-e-qafila muntazir hai

safar ke liye rasta muntazir hai

hai nazdik manzil to qadmon se mere

lipaTne ko har aabla muntazir hai

tum aa kar sanwaro ye viran gulshan

tumhaari hi KHatir saba muntazir hai

badan ki shuaon mein aisi hai KHushbu

ki har gul tere rabt ka muntazir hai

kabhi mujh se milne tu sahil pe aa ja

samundar teri did ka muntazir hai

nasibon se milta hai resham ka phanda

saza ke liye ek KHata muntazir hai

kaho aandhiyon se ki aa kar bujhaen

fana ke liye KHud diya muntazir hai

yun gham mere daman se lipTe hue hain

gaya ek to dusra muntazir hai

sar-e-aina main khaDa sochta hun

koi to pas-e-aina muntazir hai

faqat ek yahi baat kahni hai hum ko

ki barson se 'sant' aap ka muntazir hai