رہ طلب میں ہزاروں ہی راستے ناپے

رہ طلب میں ہزاروں ہی راستے ناپے

زمیں سے تا بہ فلک کتنے فاصلے ناپے

خرد نے ہاتھ اٹھائے جنوں سے کام لیا

مقام جذب کے پھر ہم نے سلسلے ناپے

مشاہدات کے دنیا سے دو قدم آگے

بہ فیض عشق ہزاروں ہی فلسفے ناپے

تلاش رمز حقیقت میں ہم نے یہ بھی کیا

کہ ماہ و انجم و اختر کے دائرے ناپے

کسی کی آہ جو زنجیر عرش سے لپٹی

تو پھر زمیں نے بھی کیا کیا نہ زلزلے ناپے

وہ بد نصیب ہے شہر حبیب میں آ کر

جو اپنے پاؤں کو دیکھے اور آبلے ناپے

خدا تو ایک ہے پھر یہ عجب خدائے سخن

کہ جس نے اپنی ہی مانند قافیے ناپے

ہماری خواہشیں دو گز زمیں پہ آ ٹھہریں

کہ ہم نے پاؤں سے شاہوں کے مقبرے ناپے