rah-e-talab mein hazaron hi raste nape

rah-e-talab meñ hazāroñ hī rāste naape

zamīñ se tā-ba-falak kitne fāsle naape

ḳhirad ne haath uThā.e junūñ se kaam liyā

maqām-e-jazb ke phir ham ne silsile naape

mushāhidāt ke duniyā se do qadam aage

ba-faiz-e-'ishq hazāroñ hī falsafe naape

talāsh-e-ramz-e-haqīqat meñ ham ne ye bhī kiyā

ki māh-o-anjum-o-aḳhtar ke dā.ere naape

kisī kī aah jo zanjīr-e-'arsh se lipTī

to phir zamīñ ne bhī kyā kyā na zalzale naape

vo bad-nasīb hai shahr-e-habīb meñ aa kar

jo apne paañv ko dekhe aur aable naape

ḳhudā to ek hai phir ye 'ajab ḳhudā-e-suḳhan

ki jis ne apnī hī mānind qāfiye naape

hamārī ḳhvāhisheñ do gaz zamīñ pe aa Thahrīñ

ki ham ne paañv se shāhoñ ke maqbare naape

rah-e-talab mein hazaron hi raste nape

zamin se ta-ba-falak kitne fasle nape

KHirad ne hath uThae junun se kaam liya

maqam-e-jazb ke phir hum ne silsile nape

mushahidat ke duniya se do qadam aage

ba-faiz-e-'ishq hazaron hi falsafe nape

talash-e-ramz-e-haqiqat mein hum ne ye bhi kiya

ki mah-o-anjum-o-aKHtar ke daere nape

kisi ki aah jo zanjir-e-'arsh se lipTi

to phir zamin ne bhi kya kya na zalzale nape

wo bad-nasib hai shahr-e-habib mein aa kar

jo apne panw ko dekhe aur aable nape

KHuda to ek hai phir ye 'ajab KHuda-e-suKHan

ki jis ne apni hi manind qafiye nape

hamari KHwahishen do gaz zamin pe aa Thahrin

ki hum ne panw se shahon ke maqbare nape