rah-e-wafa se gurez karna subut-e-KHud-agahi nahin hai

rah-e-vafā se gurez karnā subūt-e-ḳhud-āgahī nahīñ hai

maqām-e-dār-o-rasan se haT kar to duur tak zindagī nahīñ hai

yahī dalīl-e-javāz-e-mastī yahī hai buniyād-e-mai-parastī

atā-e-pīr-e-muġhāñ se kamtar mazāq-e-tishna-labī nahīñ hai

na ab vo sar-garmī-e-vafā hai na sho.ala-sāmāñ koī tamannā

junūñ taḌaptā huā nahīñ hai nazar sulagtī huī nahīñ hai

abhī ruḳh-e-kā.enāt par hai siyāhī-e-shab kā raqs-e-paiham

ye sub.h kā āftāb kyā hai jo dāġh-e-sharmindagī nahīñ hai

sahar ke monis haiñ lāla-o-gul nujūm-o-mahtāb shab ke sāthī

ye sab mire rāzdār-e-ġham haiñ yahāñ koī ajnabī nahīñ hai

nazar meñ haiñ aaj tak farozāñ vo ḳhvāb ke marmarīñ jazīre

ki jin kī ḳhāmosh rif'atoñ par koī kiran dhuup kī nahīñ hai

ummīd kā dil se hai ta’alluq na jaane phir bhī ma.aal kyā ho

charāġh tak dastaras hai lekin giraft meñ raushnī nahīñ hai

abhī ubharte hue savere pe zulmat-e-shab kī haiñ nigāheñ

maiñ aise māhaul meñ huuñ 'nāzish' jahāñ hañsī bhī hañsī nahīñ hai

rah-e-wafa se gurez karna subut-e-KHud-agahi nahin hai

maqam-e-dar-o-rasan se haT kar to dur tak zindagi nahin hai

yahi dalil-e-jawaz-e-masti yahi hai buniyaad-e-mai-parasti

ata-e-pir-e-mughan se kamtar mazaq-e-tishna-labi nahin hai

na ab wo sar-garmi-e-wafa hai na shoala-saman koi tamanna

junun taDapta hua nahin hai nazar sulagti hui nahin hai

abhi ruKH-e-kaenat par hai siyahi-e-shab ka raqs-e-paiham

ye subh ka aaftab kya hai jo dagh-e-sharmindagi nahin hai

sahar ke monis hain lala-o-gul nujum-o-mahtab shab ke sathi

ye sab mere raazdar-e-gham hain yahan koi ajnabi nahin hai

nazar mein hain aaj tak farozan wo KHwab ke marmarin jazire

ki jin ki KHamosh rif'aton par koi kiran dhup ki nahin hai

ummid ka dil se hai ta’alluq na jaane phir bhi maal kya ho

charagh tak dastaras hai lekin giraft mein raushni nahin hai

abhi ubharte hue sawere pe zulmat-e-shab ki hain nigahen

main aise mahaul mein hun 'nazish' jahan hansi bhi hansi nahin hai