رہ گئے بس عشق دریا سے یہ ناطے رہ گئے

رہ گئے بس عشق دریا سے یہ ناطے رہ گئے

ہم صدف آنکھوں سے اب گوہر لٹاتے رہ گئے

رہ گئے ہم ساز دل کے ٹوٹ جانے پر بھی خوش

درد غزلوں میں چھپا کر گنگناتے رہ گئے

رہ گئے ہم پیار کے ہر اسم سے دے کر صدا

روٹھ کر وہ چل دئے اور ہم مناتے رہ گئے

رہ گئے خاموش وہ بھی عشق کے اظہار پر

میرے لب پر بھی اشارے آتے آتے رہ گئے

رہ گئے سارے فسانوں میں نشاں ان کے ہی اور

راز دل ہم اس زمانہ سے چھپاتے رہ گئے

رہ گئے یوں تو اندھیرے ہجر کے دل میں مگر

وصل کی اک شمع ہم پھر بھی جلاتے رہ گئے

رہ گئے ہم آرزوؔ دل کی دبا کر دل میں ہی

نقش پا ان کی تمنا کے مٹاتے رہ گئے