رہ ہی نہیں سکا میں کبھی چاک سے الگ

رہ ہی نہیں سکا میں کبھی چاک سے الگ

ہوتی نہیں ہے خاک کبھی خاک سے الگ

ہر گام ورغلایا ہے اس نے حیات کو

بچتا پھرا ہوں فتنۂ ادراک سے الگ

کچھ آنسوؤں کو کوزۂ دل میں سمیٹ کر

رکھا ہے میں نے دیدۂ نمناک سے الگ

حالانکہ اپنی وسعت پرواز کے خلاف

اڑتا رہا ہوں میں حد افلاک سے الگ

یہ بھی ہنر عجیب ہے تیرا اے خوش لباس

خوشبو کو تو نے رکھا ہے پوشاک سے الگ

شاکر حسینؔ اپنا بھی انجام تھا وہی

ہم ہو نہیں سکے خس و خاشاک سے الگ