rah-nawardi ka sabaq kaam uske aaKHir aa gaya

rah-navardī kā sabaq kaam us ke āḳhir aa gayā

phir palaT ke dasht meñ TuuTā musāfir aa gayā

maiñ hī kuchh apne meñ gum thā varna manzar thā hasīñ

chāñdnī meñ nāchne ko ek taa.ir aa gayā

is sulagtī dhuup meñ apnā ḳhayābāñ chhoḌ kar

dekh le vo zaḳhm khāne terī ḳhātir aa gayā

saare rishte saañp ban kar Das ga.e 'nusrat' mujhe

thā fareb-e-chehragī jis meñ vo shā.ir aa gayā

rah-nawardi ka sabaq kaam us ke aaKHir aa gaya

phir palaT ke dasht mein TuTa musafir aa gaya

main hi kuchh apne mein gum tha warna manzar tha hasin

chandni mein nachne ko ek tair aa gaya

is sulagti dhup mein apna KHayaban chhoD kar

dekh le wo zaKHm khane teri KHatir aa gaya

sare rishte sanp ban kar Das gae 'nusrat' mujhe

tha fareb-e-chehragi jis mein wo shair aa gaya