rah rah ke teri yaad satae to kya karun

rah rah ke terī yaad satā.e to kyā karūñ

terā ḳhayāl dil se na jaa.e to kyā karūñ

vaa.iz agar qusūr hai kar le malāmateñ

āñkhoñ se koī dil meñ samā.e to kyā karūñ

maanā ki hai sharāb kā chhūnā harām par

hāthoñ se apne koī pilā.e to kyā karūñ

kāshāna apne dil kā mujhe bhī aziiz hai

barq-e-nazar se koī jalā.e to kyā karūñ

hai ḳhauf agarche aah meñ ifshā-e-rāz kā

be-sāḳhta nikal hī jo aa.e to kyā karūñ

ye mausam-e-bahār nau-phūloñ kā ye nikhār

ḳhvābīda aarzū ko jagā.e to kyā karūñ

ye to nahīñ 'jalāl' mire bas kā rog hai

dīvāna koī mujh ko banā.e to kyā karūñ

rah rah ke teri yaad satae to kya karun

tera KHayal dil se na jae to kya karun

waiz agar qusur hai kar le malamaten

aankhon se koi dil mein samae to kya karun

mana ki hai sharab ka chhuna haram par

hathon se apne koi pilae to kya karun

kashana apne dil ka mujhe bhi aziz hai

barq-e-nazar se koi jalae to kya karun

hai KHauf agarche aah mein ifsha-e-raaz ka

be-saKHta nikal hi jo aae to kya karun

ye mausam-e-bahaar nau-phulon ka ye nikhaar

KHwabida aarzu ko jagae to kya karun

ye to nahin 'jalal' mere bas ka rog hai

diwana koi mujh ko banae to kya karun