rah-raw-e-rah-e-mohabbat kaun si manzil mein hai

rah-rav-e-rāh-e-mohabbat kaun sī manzil meñ hai

dil hai be-zār-e-mohabbat aur mohabbat dil meñ hai

kyā zabāñ par hai kisī kī kyā kisī ke dil meñ hai

jis kī mahfil hai vahī jaane vo jis mushkil meñ hai

kārvān-e-husn-o-ishq ab tak kahīñ Thahrā nahīñ

qais abhī sahrā meñ hai lailā abhī mahmil meñ hai

ishrat-e-rafta kā ronā kyā ġham-e-imroz meñ

aish-e-fardā bhī vo maazī hai jo mustaqbil meñ hai

rañg-e-mahfil meñ nazar aatā hai ik rañg-e-digar

terī mahfil ke sivā bhī kuchh tirī mahfil meñ hai

ham-safar kuchh din rahe lekin ḳhudā jaane ki ab

ishq hai kis marhale meñ husn kis manzil meñ hai

manzil-e-maqsūd 'bismil' vo nazar aane lagī

har nazar manzil pe jaise har qadam manzil meñ hai

rah-raw-e-rah-e-mohabbat kaun si manzil mein hai

dil hai be-zar-e-mohabbat aur mohabbat dil mein hai

kya zaban par hai kisi ki kya kisi ke dil mein hai

jis ki mahfil hai wahi jaane wo jis mushkil mein hai

karwan-e-husn-o-ishq ab tak kahin Thahra nahin

qais abhi sahra mein hai laila abhi mahmil mein hai

ishrat-e-rafta ka rona kya gham-e-imroz mein

aish-e-farda bhi wo mazi hai jo mustaqbil mein hai

rang-e-mahfil mein nazar aata hai ek rang-e-digar

teri mahfil ke siwa bhi kuchh teri mahfil mein hai

ham-safar kuchh din rahe lekin KHuda jaane ki ab

ishq hai kis marhale mein husn kis manzil mein hai

manzil-e-maqsud 'bismil' wo nazar aane lagi

har nazar manzil pe jaise har qadam manzil mein hai