rah wafa mein koi sahib-e-junun na mila

rah vafā meñ koī sāhib-e-junūñ na milā

diloñ meñ azm to paa.e ragoñ meñ ḳhuuñ na milā

hazār ham se muqaddar ne kī daġhā lekin

hameñ miTā ke muqaddar ko bhī sukūñ na milā

guloñ ke ruḳh pe vahī tāzgī kā aalam hai

na jaane un ko ġham-e-rozgār kyuuñ na milā

kahāñ se laa.e vo ik bul-havas mazāq-e-salīm

jise nazar to milī jazba-e-darūñ na milā

milī thiiñ tark-e-mohabbat ke ba.ad bhī āñkheñ

magar vo kaif vo e.ajāz vo fusūñ na milā

falak-shigāf thā is darja iztirāb-e-amal

ki bandagī meñ farishtoñ ko bhī sukūñ na milā

na jaane kis ke sahāre rukā huā hai falak

hameñ to farsh-e-zamīñ par koī sutūñ na milā

rah wafa mein koi sahib-e-junun na mila

dilon mein azm to pae ragon mein KHun na mila

hazar hum se muqaddar ne ki dagha lekin

hamein miTa ke muqaddar ko bhi sukun na mila

gulon ke ruKH pe wahi tazgi ka aalam hai

na jaane un ko gham-e-rozgar kyun na mila

kahan se lae wo ek bul-hawas mazaq-e-salim

jise nazar to mili jazba-e-darun na mila

mili thin tark-e-mohabbat ke baad bhi aankhen

magar wo kaif wo eajaz wo fusun na mila

falak-shigaf tha is darja iztirab-e-amal

ki bandagi mein farishton ko bhi sukun na mila

na jaane kis ke sahaare ruka hua hai falak

hamein to farsh-e-zamin par koi sutun na mila