raha hai qafila-e-gul ka intizar kise

rahā hai qāfila-e-gul kā intizār kise

ab aa.e bhī to yahāñ pā.egī bahār kise

maiñ ek sāya-e-larzāñ shikasta ḳhvāboñ kā

mire vajūd kā aa.egā e'tibār kise

ḳhud apnī zaat ko is ḳhāk-dāñ meñ gum kar ke

vo DhūñDhne ko chalā hai ufuq ke paar kise

tuyūr-e-ḳhvāb giraft-e-nazar meñ kyā aa.eñ

khulī fazā ke parindoñ pe iḳhtiyār kise

ḳhud apne raaz bhī ḳhud se chhupā ke phirte haiñ log

yahāñ banā.e koī apnā rāz-dār kise

vo kaun thā ki jo dil se guzar gayā chup-chāp

sukūt-e-ġham ne sadā dī thī baar baar kise

hayāt kyā hai ḳhud apnī hī justujū 'maḳhmūr'

ye justujū magar aa.ī hai sāzgār kise

raha hai qafila-e-gul ka intizar kise

ab aae bhi to yahan paegi bahaar kise

main ek saya-e-larzan shikasta KHwabon ka

mere wajud ka aaega e'tibar kise

KHud apni zat ko is KHak-dan mein gum kar ke

wo DhunDhne ko chala hai ufuq ke par kise

tuyur-e-KHwab giraft-e-nazar mein kya aaen

khuli faza ke parindon pe iKHtiyar kise

KHud apne raaz bhi KHud se chhupa ke phirte hain log

yahan banae koi apna raaz-dar kise

wo kaun tha ki jo dil se guzar gaya chup-chap

sukut-e-gham ne sada di thi bar bar kise

hayat kya hai KHud apni hi justuju 'maKHmur'

ye justuju magar aai hai sazgar kise