raha karte hain mai-KHanon mein hum pir-e-mughan ho kar

rahā karte haiñ mai-ḳhānoñ meñ ham pīr-e-muġhāñ ho kar

tabī.at zinda-dil rakhtī hai piirī meñ javāñ ho kar

chhupe the qabr meñ gardish-zada kyā shādmāñ ho kar

yahāñ bhī saath hai daurān-e-sarkā āsmāñ ho kar

huā hai shohra dāġhoñ kā nisār-e-gul-ruḳhāñ ho kar

uḌī bū-e-vafā merī nasīm-e-bostāñ ho kar

jhukegī rafta rafta shāḳh-e-naḳhl-e-qad kamāñ ho kar

khiñchegā tuul furqat kā zah-e-tīr-e-fuġhāñ ho kar

mushābah kar diyā kyuuñ zo.af ne un kī nazākat se

mujhe ḳhud apne uupar rashk aayā nā-tavāñ ho kar

ga.ī raunaq bhī chehre kī havās-o-aql jaate haiñ

uḌā sab rañg-e-ruḳh vahshat meñ gard-e-kārvāñ ho kar

zamīñ par sozish-e-ġham se giregā āsmāñ jal kar

sharār-e-dil chalā sar halqa-e-daur-e-fuġhāñ ho kar

tasadduq un pe hotā huuñ jo sho.ale dil se uThte haiñ

basar kartā huuñ maiñ parvāna-e-sham-e-fuġhāñ ho kar

fanā ho kar kahīñ miTtī hai yārab shorish-e-vahshat

fuġhāñ kartā huuñ maiñ zanjīr-e-bāb-e-lā-makāñ ho kar

ḳhudā samjhe hamārī āh-e-sozāñ se judā.ī meñ

ki saarī dil kī tāqat uḌ ga.ī muñh se dhuāñ ho kar

dil-e-nālāñ ne ham-sāyoñ ko bhī dushman kiyā apnā

rahā karte haiñ ham battīs dāñtoñ meñ zabāñ ho kar

hamesha se 'nazar' ham mahv-e-yād-e-rū-e-raushan haiñ

chamak is dard kī rassī se ham dil meñ nūr-e-jāñ ho kar

raha karte hain mai-KHanon mein hum pir-e-mughan ho kar

tabiat zinda-dil rakhti hai piri mein jawan ho kar

chhupe the qabr mein gardish-zada kya shadman ho kar

yahan bhi sath hai dauran-e-sarka aasman ho kar

hua hai shohra daghon ka nisar-e-gul-ruKHan ho kar

uDi bu-e-wafa meri nasim-e-bostan ho kar

jhukegi rafta rafta shaKH-e-naKHl-e-qad kaman ho kar

khinchega tul furqat ka zah-e-tir-e-fughan ho kar

mushabah kar diya kyun zoaf ne un ki nazakat se

mujhe KHud apne upar rashk aaya na-tawan ho kar

gai raunaq bhi chehre ki hawas-o-aql jate hain

uDa sab rang-e-ruKH wahshat mein gard-e-karwan ho kar

zamin par sozish-e-gham se girega aasman jal kar

sharar-e-dil chala sar halqa-e-daur-e-fughan ho kar

tasadduq un pe hota hun jo shoale dil se uThte hain

basar karta hun main parwana-e-sham-e-fughan ho kar

fana ho kar kahin miTti hai yarab shorish-e-wahshat

fughan karta hun main zanjir-e-bab-e-la-makan ho kar

KHuda samjhe hamari aah-e-sozan se judai mein

ki sari dil ki taqat uD gai munh se dhuan ho kar

dil-e-nalan ne ham-sayon ko bhi dushman kiya apna

raha karte hain hum battis danton mein zaban ho kar

hamesha se 'nazar' hum mahw-e-yaad-e-ru-e-raushan hain

chamak is dard ki rassi se hum dil mein nur-e-jaan ho kar