رہا مضطرب نہ دل حزیں کہ وہ شب گئی وہ سحر گئی

رہا مضطرب نہ دل حزیں کہ وہ شب گئی وہ سحر گئی

نہیں اب تلاش سکوں مجھے جو گزر رہی تھی گزر گئی

نہ کھٹک ہوئی کہ وہ شب ڈھلی نہ خبر ہوئی کہ سحر گئی

وہ ملے کبھی تو کچھ اس طرح کہ حیات جیسے گزر گئی

تری یاد دل سے نہ جا سکی رہی وہ شریک غم و خوشی

کبھی پھول بن کے مہک اٹھی کبھی خار بن کے اتر گئی

نا مری حیات کے دن تھے وہ نہ مری حیات کی رات تھی

جو ترے بغیر بسر ہوئے جو ترے بغیر گزر گئی

وہی پھول صحن حیات سے مری زندگی نے اٹھا لیا

نہ جسے کسی کی طلب ہوئی نہ جدھر کسی کی نظر گئی

مری زندگی تو تباہ تھی ترے غم سے پہلے بھی ہم نشیں

مری زندگی کا سوال کیا تری زندگی تو سنور گئی

تھا حسین رنگ فضاؤں میں کہ تمہاری زلف کی چھاؤں میں

وہ حسین شام تھی کس قدر جو تمہارے ساتھ گزر گئی

ہے ایازؔ آج بھی نوحہ گر اسی بے وفا کے لئے مگر

کوئی کہہ دے اس سے کہ بے خبر وہ ادا گئی وہ نظر گئی