raha muztarib na dil-e-hazin ki wo shab gai wo sahar gai

rahā muztarib na dil-e-hazīñ ki vo shab ga.ī vo sahar ga.ī

nahīñ ab talāsh-e-sukūñ mujhe jo guzar rahī thī guzar ga.ī

na khaTak huī ki vo shab Dhalī na ḳhabar huī ki sahar ga.ī

vo mile kabhī to kuchh is tarah ki hayāt jaise guzar ga.ī

tirī yaad dil se na jā sakī rahī vo sharīk-e-ġham-o-ḳhushī

kabhī phuul ban ke mahak uThī kabhī ḳhaar ban ke utar ga.ī

na mirī hayāt ke din the vo na mirī hayāt kī raat thī

jo tire baġhair basar hue jo tire baġhair guzar ga.ī

vahī phuul sahn-e-hayāt se mirī zindagī ne uThā liyā

na jise kisī kī talab huī na jidhar kisī kī nazar ga.ī

mirī zindagī to tabāh thī tire ġham se pahle bhī ham-nashīñ

mirī zindagī kā savāl kyā tirī zindagī to sañvar ga.ī

thā hasīn rang fazāoñ meñ ki tumhārī zulf kī chhāñv meñ

vo hasīn shaam thī kis qadar jo tumhāre saath guzar ga.ī

hai 'ayāz' aaj bhī nauhagar usī be-vafā ke liye magar

koī kah de us se ki be-ḳhabar vo adā ga.ī vo nazar ga.ī

raha muztarib na dil-e-hazin ki wo shab gai wo sahar gai

nahin ab talash-e-sukun mujhe jo guzar rahi thi guzar gai

na khaTak hui ki wo shab Dhali na KHabar hui ki sahar gai

wo mile kabhi to kuchh is tarah ki hayat jaise guzar gai

teri yaad dil se na ja saki rahi wo sharik-e-gham-o-KHushi

kabhi phul ban ke mahak uThi kabhi KHar ban ke utar gai

na meri hayat ke din the wo na meri hayat ki raat thi

jo tere baghair basar hue jo tere baghair guzar gai

wahi phul sahn-e-hayat se meri zindagi ne uTha liya

na jise kisi ki talab hui na jidhar kisi ki nazar gai

meri zindagi to tabah thi tere gham se pahle bhi ham-nashin

meri zindagi ka sawal kya teri zindagi to sanwar gai

tha hasin rang fazaon mein ki tumhaari zulf ki chhanw mein

wo hasin sham thi kis qadar jo tumhaare sath guzar gai

hai 'ayaz' aaj bhi nauhagar usi be-wafa ke liye magar

koi kah de us se ki be-KHabar wo ada gai wo nazar gai