رہا نہ جینے کا دل میں جو حوصلہ باقی

رہا نہ جینے کا دل میں جو حوصلہ باقی

تو زندہ رہنے میں کیا رہ گیا مزہ باقی

وہ چھین لے گئے ساری متاع عزم و عمل

ہمارے حصے میں بس رہ گئی دعا باقی

یہ ہم سفر مرے کن راستوں پہ چل نکلے

رفاقتوں کے نہیں جن پہ نقش پا باقی

ہزار دامن دل کو چھڑا رہا ہوں مگر

وہی ہے آج بھی یادوں کا سلسلہ باقی

کچھ ایسا شہر پہ چھایا کدورتوں کا غبار

کہیں بچا کوئی منظر نہ جاں فزا باقی

اک ازدحام ہے چہروں کا گرد و پیش مگر

نہ ہم زباں کوئی باقی نہ دل ربا باقی

بہت مٹائے گئے ظلم کے نقوش مگر

لہو کے داغ ابھی تک ہیں جا بجا باقی