raha na jine ka dil mein jo hausla baqi

rahā na jiine kā dil meñ jo hausla baaqī

to zinda rahne meñ kyā rah gayā maza baaqī

vo chhīn le ga.e saarī matā.a-e-azm-o-amal

hamāre hisse meñ bas rah ga.ī duā baaqī

ye ham-safar mire kin rāstoñ pe chal nikle

rafāqatoñ ke nahīñ jin pe naqsh-e-pā baaqī

hazār dāman-e-dil ko chhuḌā rahā huuñ magar

vahī hai aaj bhī yādoñ kā silsila baaqī

kuchh aisā shahr pe chhāyā kudūratoñ kā ġhubār

kahīñ bachā koī manzar na jāñ-fazā baaqī

ik izhdihām hai chehroñ kā gird-o-pesh magar

na ham-zabāñ koī baaqī na dilrubā baaqī

bahut miTā.e ga.e zulm ke nuqūsh magar

lahū ke daaġh abhī tak haiñ jā-ba-jā baaqī

raha na jine ka dil mein jo hausla baqi

to zinda rahne mein kya rah gaya maza baqi

wo chhin le gae sari mataa-e-azm-o-amal

hamare hisse mein bas rah gai dua baqi

ye ham-safar mere kin raston pe chal nikle

rafaqaton ke nahin jin pe naqsh-e-pa baqi

hazar daman-e-dil ko chhuDa raha hun magar

wahi hai aaj bhi yaadon ka silsila baqi

kuchh aisa shahr pe chhaya kuduraton ka ghubar

kahin bacha koi manzar na jaan-faza baqi

ek izhdiham hai chehron ka gird-o-pesh magar

na ham-zaban koi baqi na dilruba baqi

bahut miTae gae zulm ke nuqush magar

lahu ke dagh abhi tak hain ja-ba-ja baqi