raha raushan hamesha matla-e-fikr-o-nazar apna

rahā raushan hamesha matl.a-e-fikr-o-nazar apnā

hathelī kā charāġh aur daar kā sūraj hai sar apnā

kareñ vo sang-bārī shauq se hāzir hai sar apnā

magar jī bhar ke pahle dekh leñ shīshe kā ghar apnā

mirā ehsās-e-mahrūmī nahīñ iz.hār-e-māyūsī

abhī kyā hai abhī to dosh par baaqī hai sar apnā

chhupā.ūñ is chaman meñ kis tarah kāñToñ bharā dāman

ki maiñ ne de ke sīñchā thā jise ḳhūn-e-jigar apnā

maiñ vo ā.īna-e-jaur-o-jafā-e-nāz huuñ jis ko

agar dekhe to ḳhud sar piiT le ā.īna-gar apnā

maiñ kis muñh se karūñ ab gardish-e-ayyām kā shikva

talāsh us ko kisī kī thī batā baiThā maiñ ghar apnā

naqāb-e-ruḳh ulaT kar baam par ab tum bhī aa jaao

maiñ phailā.e hue huuñ dāman-e-zauq-e-nazar apnā

koī kaise badal saktā hai fitrat ke taqāzoñ ko

ki hijrat ke havāle se jo yaad aatā hai ghar apnā

jo bīmārī kī sun kar 'zabt' aate haiñ ayādat ko

bharā rahtā hai aksar aise mehmānoñ se ghar apnā

raha raushan hamesha matla-e-fikr-o-nazar apna

hatheli ka charagh aur dar ka suraj hai sar apna

karen wo sang-bari shauq se hazir hai sar apna

magar ji bhar ke pahle dekh len shishe ka ghar apna

mera ehsas-e-mahrumi nahin izhaar-e-mayusi

abhi kya hai abhi to dosh par baqi hai sar apna

chhupaun is chaman mein kis tarah kanTon bhara daman

ki main ne de ke sincha tha jise KHun-e-jigar apna

main wo aaina-e-jaur-o-jafa-e-naz hun jis ko

agar dekhe to KHud sar piT le aaina-gar apna

main kis munh se karun ab gardish-e-ayyam ka shikwa

talash us ko kisi ki thi bata baiTha main ghar apna

naqab-e-ruKH ulaT kar baam par ab tum bhi aa jao

main phailae hue hun daman-e-zauq-e-nazar apna

koi kaise badal sakta hai fitrat ke taqazon ko

ki hijrat ke hawale se jo yaad aata hai ghar apna

jo bimari ki sun kar 'zabt' aate hain ayaadat ko

bhara rahta hai aksar aise mehmanon se ghar apna