rahbar-e-jada-e-manzil pe hansi aati hai

rahbar-e-jāda-e-manzil pe hañsī aatī hai

laḌkhaḌāte hue is dil pe hañsī aatī hai

hasrat-e-qurbat-e-manzil pe hañsī aatī hai

ab to dīvāngī-e-dil pe hañsī aatī hai

yaad kar ke tirī sūrat tirī bāteñ aksar

yuuñ taḌaptā hai ki is dil pe hañsī aatī hai

'umr gum kar ke farāham kiyā sāmān-e-hayāt

ab mujhe ziist ke hāsil pe hañsī aatī hai

qulzum-e-ġham meñ to hote haiñ kināre bhī bhañvar

jab ye suntā huuñ to sāhil pe hañsī aatī hai

jagmagātā hai jo sūraj kī shu'ā'oñ ke tufail

is bhikārī mah-e-kāmil pe hañsī aatī hai

'soz' har lamha vahī maslahat-e-vaqt kī baat

sun ke dīvāne ko 'āqil pe hañsī aatī hai

rahbar-e-jada-e-manzil pe hansi aati hai

laDkhaDate hue is dil pe hansi aati hai

hasrat-e-qurbat-e-manzil pe hansi aati hai

ab to diwangi-e-dil pe hansi aati hai

yaad kar ke teri surat teri baaten aksar

yun taDapta hai ki is dil pe hansi aati hai

'umr gum kar ke faraham kiya saman-e-hayat

ab mujhe zist ke hasil pe hansi aati hai

qulzum-e-gham mein to hote hain kinare bhi bhanwar

jab ye sunta hun to sahil pe hansi aati hai

jagmagata hai jo suraj ki shu'a'on ke tufail

is bhikari mah-e-kaamil pe hansi aati hai

'soz' har lamha wahi maslahat-e-waqt ki baat

sun ke diwane ko 'aqil pe hansi aati hai