rahe hai aaj kal kuchh is tarah charKH-e-kuhan bigDa

rahe hai aaj kal kuchh is tarah charḳh-e-kuhan bigḌā

mare hī āshiyāñ se jaise ye nazm-e-chaman bigḌā

kahāñ guzrī hai saarī raat kuchh ham bhī suneñ āḳhir

ye ruḳh ye chāñdnī chhiTkī ye tār-e-pairahan bigḌā

baras kar rah ga.iiñ kaliyāñ chaman ke farsh-e-rañgīñ par

pakaḌ kar shāḳh jab kal shaam vo ġhuncha-dahan bigḌā

tirī nazroñ hī tak thā sab salīqa ahl-e-mahfil kā

tire uThte hī jān-e-husn rañg-e-anjuman bigḌā

kise aatā thā jiinā is se pahle terī duniyā meñ

sañvārā hai mohabbat ne mazāq-e-rūh-o-tan bigḌā

gilā thā bevafā.ī kā hameñ par un se kyā kahiye

vo kahte haiñ ki hai kuchh in dinoñ terā chalan bigḌā

rahe hai aaj kal kuchh is tarah charKH-e-kuhan bigDa

mare hi aashiyan se jaise ye nazm-e-chaman bigDa

kahan guzri hai sari raat kuchh hum bhi sunen aaKHir

ye ruKH ye chandni chhiTki ye tar-e-pairahan bigDa

baras kar rah gain kaliyan chaman ke farsh-e-rangin par

pakaD kar shaKH jab kal sham wo ghuncha-dahan bigDa

teri nazron hi tak tha sab saliqa ahl-e-mahfil ka

tere uThte hi jaan-e-husn rang-e-anjuman bigDa

kise aata tha jina is se pahle teri duniya mein

sanwara hai mohabbat ne mazaq-e-ruh-o-tan bigDa

gila tha bewafai ka hamein par un se kya kahiye

wo kahte hain ki hai kuchh in dinon tera chalan bigDa