rahe hum aashiyan mein bhi to barq-e-ashiyan ho kar

rahe ham āshiyāñ meñ bhī to barq-e-āshiyāñ ho kar

lagā dī aag apne ghar meñ sargarm-e-fuġhāñ ho kar

na apne ġham-zadoñ ko ḳhush karo ab mehrbāñ ho kar

buto tum ḳhush raho ham kyā kareñge shādmāñ ho kar

khile ġhunche na bū phūTī na shāḳh-e-gul phalī-phūlī

qafas meñ jab se ham aa.e bahār aa.ī ḳhizāñ ho kar

chale ho gul-badāmāñ kuchh to kahte jaao un se bhī

ki tum se kah rahe haiñ kuchh anādil ham-zabāñ ho kar

javāñ hone na paa.e the ki dil aayā hasīnoñ par

ajal ye kahtī aa.ī kyā karoge tum javāñ ho kar

hue past aise un kī ḳhaak bhī uḌte nahīñ dekhī

rahe rahne ko kitne is zamīñ par āsmāñ ho kar

jo khul kar vaar muusā par to ham par choT parde meñ

vahī jalva ayaañ ho kar vahī jalva nihāñ ho kar

qayāmat un kī chheḌeñ haiñ mire betāb karne ko

jo nāvak aa.e chuTkī se to un kī chuTkiyāñ ho kar

milāyā ḳhaak ho kar hasratoñ ko apnī miTTī meñ

chhupāyā kārvāñ ko ham ne gard-e-kārvāñ ho kar

kabhī taqrīr-e-sāqī meñ jo laġhzish us ne paa.ī hai

to mauj-e-mai ne ham se guftugū kī hai zabāñ ho kar

ye rañgīñ nāra-e-mastāna kis ke haiñ are zāhid

sadā nāqūs kī de dī kahīñ gūñjī azaañ ho kar

tire kūche meñ piisā hai usī ne ham ġharīboñ ko

girā hai sāya-e-dīvār ham par āsmāñ ho kar

kisī mahram sambhālegī na dohrā.e hue āñchal

raheñge vo na qaabū meñ kisī ke bhī javāñ ho kar

dakan meñ kyā vazīr-e-fauj ne mehmāñ navāzī kī

janāb-e-'shād' ke dar se phire ham shādmāñ ho kar

'riyāz' is vaz.a se pahuñche ki bole mai-kade vaale

buzurg-e-ḳhizr-sūrat aa.e jannat meñ javāñ ho kar

rahe hum aashiyan mein bhi to barq-e-ashiyan ho kar

laga di aag apne ghar mein sargarm-e-fughan ho kar

na apne gham-zadon ko KHush karo ab mehrban ho kar

buto tum KHush raho hum kya karenge shadman ho kar

khile ghunche na bu phuTi na shaKH-e-gul phali-phuli

qafas mein jab se hum aae bahaar aai KHizan ho kar

chale ho gul-badaman kuchh to kahte jao un se bhi

ki tum se kah rahe hain kuchh anadil ham-zaban ho kar

jawan hone na pae the ki dil aaya hasinon par

ajal ye kahti aai kya karoge tum jawan ho kar

hue past aise un ki KHak bhi uDte nahin dekhi

rahe rahne ko kitne is zamin par aasman ho kar

jo khul kar war musa par to hum par choT parde mein

wahi jalwa ayan ho kar wahi jalwa nihan ho kar

qayamat un ki chheDen hain mere betab karne ko

jo nawak aae chuTki se to un ki chuTkiyan ho kar

milaya KHak ho kar hasraton ko apni miTTi mein

chhupaya karwan ko hum ne gard-e-karwan ho kar

kabhi taqrir-e-saqi mein jo laghzish us ne pai hai

to mauj-e-mai ne hum se guftugu ki hai zaban ho kar

ye rangin nara-e-mastana kis ke hain are zahid

sada naqus ki de di kahin gunji azan ho kar

tere kuche mein pisa hai usi ne hum gharibon ko

gira hai saya-e-diwar hum par aasman ho kar

kisi mahram sambhaalegi na dohrae hue aanchal

rahenge wo na qabu mein kisi ke bhi jawan ho kar

dakan mein kya wazir-e-fauj ne mehman nawazi ki

janab-e-'shad' ke dar se phire hum shadman ho kar

'riyaz' is waza se pahunche ki bole mai-kade wale

buzurg-e-KHizr-surat aae jannat mein jawan ho kar