rahe hamesha muKHatib bas apni zat se hum

rahe hamesha muḳhātib bas apnī zaat se ham

rujūa hote bhī kyā husn-e-kā.enāt se ham

ab aa ga.ī hai vo saa.at ki din kī baat kareñ

Darā kareñge kahāñ tak añdherī raat se ham

qadam qadam pe to ham ne hai zehn ko gherā

qadam qadam pe bache go tavahhumāt se ham

ḳhudā ke vāste ab dām-e-āgahī na bichhā

Darā kiye haiñ ḳhirad terī baat baat se ham

na chhūT paa.e haiñ ab tak na chhūT pā.eñge

dil-o-nigāh ke rangīñ muāmlāt se ham

khuleñ to kaise khuleñ rāz-hā-e-aql-o-junūñ

nigāh phere hue haiñ mushāhidāt se ham

hameñ yaqīñ meñ bhī ab shak dikhā.ī detā hai

ghire hue haiñ kuchh aise hī vāqi.āt se ham

zamāna laakh kare koshisheñ bachāne kī

nikal sakeñge na afsūn-e-iltifāt se ham

hameñ Darā.eñ na ahbāb ab havādis se

bane hue haiñ haqīqat meñ hādsāt se ham

zamāna urdu adab ko bhulā na pā.egā

banā rahe haiñ vo tasvīr apne haath se ham

zabāñ tak aa nahīñ paa.ī sadā-e-dil 'qādir'

bañdhe hue haiñ kuchh aise takallufāt se ham

rahe hamesha muKHatib bas apni zat se hum

rujua hote bhi kya husn-e-kaenat se hum

ab aa gai hai wo saat ki din ki baat karen

Dara karenge kahan tak andheri raat se hum

qadam qadam pe to hum ne hai zehn ko ghera

qadam qadam pe bache go tawahhumat se hum

KHuda ke waste ab dam-e-agahi na bichha

Dara kiye hain KHirad teri baat baat se hum

na chhuT pae hain ab tak na chhuT paenge

dil-o-nigah ke rangin muamlat se hum

khulen to kaise khulen raaz-ha-e-aql-o-junun

nigah phere hue hain mushahidat se hum

hamein yaqin mein bhi ab shak dikhai deta hai

ghire hue hain kuchh aise hi waqiat se hum

zamana lakh kare koshishen bachane ki

nikal sakenge na afsun-e-iltifat se hum

hamein Daraen na ahbab ab hawadis se

bane hue hain haqiqat mein hadsat se hum

zamana urdu adab ko bhula na paega

bana rahe hain wo taswir apne hath se hum

zaban tak aa nahin pai sada-e-dil 'qadir'

bandhe hue hain kuchh aise takallufat se hum