rahe KHiram salamat nadi ke dhaaron ka

rahe ḳhirām salāmat nadī ke dhāroñ kā

nikal na jaa.e kahīñ dam magar kināroñ kā

thā iztirāb-o-tamannā-e-dīd gul kā karam

bahut kaThin thā safar varna ḳhārzāroñ kā

satā rahī hai dil-e-shab ko kal ke chāñd kī yaad

uḌā uḌā sā hai kuchh aaj rañg tāroñ kā

jo ḳhush hai ek to us kī vafā ke charche haiñ

dukhā.e dil vo jahāñ meñ bhale hazāroñ kā

yahī hai lutf to phir jaur kis ko kahte haiñ

na samjhā koī bhī matlab tire ishāroñ kā

tan-e-barahna ho jaise libās kā muhtāj

huā hai sher bhī marhūn isti'āroñ kā

use to husn kī hurmat kā paas thā itnā

ki kā.enāt mu'ammā hai parda-dāroñ kā

ho ibtilā se jahāñ 'āshiqī kī paimā.ish

to kyā ajab ho vahāñ josh be-qarāroñ kā

rahe KHiram salamat nadi ke dhaaron ka

nikal na jae kahin dam magar kinaron ka

tha iztirab-o-tamanna-e-did gul ka karam

bahut kaThin tha safar warna KHarzaron ka

sata rahi hai dil-e-shab ko kal ke chand ki yaad

uDa uDa sa hai kuchh aaj rang taron ka

jo KHush hai ek to us ki wafa ke charche hain

dukhae dil wo jahan mein bhale hazaron ka

yahi hai lutf to phir jaur kis ko kahte hain

na samjha koi bhi matlab tere ishaaron ka

tan-e-barahna ho jaise libas ka muhtaj

hua hai sher bhi marhun isti'aron ka

use to husn ki hurmat ka pas tha itna

ki kaenat mu'amma hai parda-daron ka

ho ibtila se jahan 'ashiqi ki paimaish

to kya ajab ho wahan josh be-qararon ka