rahegi dastan baqi hai jab tak ye jahan baqi

rahegī dāstāñ baaqī hai jab tak ye jahāñ baaqī

kahīñ baaqī haiñ qissa-go kahīñ haiñ rāz-dāñ baaqī

'abas hai faḳhr ai dil tajraboñ kī āzmā.ish par

abhī fardā ke insānoñ kī ḳhātir haiñ zamāñ baaqī

makīñ kitne haiñ be-dīvār-o-dar ke in zamīnoñ par

nahīñ hai sar pe gar saaya to kyā hai āsmāñ baaqī

ḳhizāñ ne kar diyā barbād terā gulsitāñ to kyā

abhī to us kī rāhoñ par haiñ lākhoñ āshiyāñ baaqī

nahīñ achchhā zabān-e-hāl se āh-o-bukā Tapkeñ

abhī maazī ke lab par hī hai kuchh shor-e-fuġhāñ baaqī

fareb-e-va.ada-e-fardā bahut hī 'ārzī shai hai

raheñge 'umr bhar is dil pe choToñ ke nishāñ baaqī

gila tū kar na apnī ābla-pā.ī kā ro-ro kar

hazāroñ rāste baaqī hazāroñ kārvāñ baaqī

abhī se is tarah 'hānī' na baiTho mutma.in ho kar

abhī to aur bhī dushvār-tar haiñ imtihāñ baaqī

rahegi dastan baqi hai jab tak ye jahan baqi

kahin baqi hain qissa-go kahin hain raaz-dan baqi

'abas hai faKHr ai dil tajrabon ki aazmaish par

abhi farda ke insanon ki KHatir hain zaman baqi

makin kitne hain be-diwar-o-dar ke in zaminon par

nahin hai sar pe gar saya to kya hai aasman baqi

KHizan ne kar diya barbaad tera gulsitan to kya

abhi to us ki rahon par hain lakhon aashiyan baqi

nahin achchha zaban-e-haal se aah-o-buka Tapken

abhi mazi ke lab par hi hai kuchh shor-e-fughan baqi

fareb-e-wada-e-farda bahut hi 'arzi shai hai

rahenge 'umr bhar is dil pe choTon ke nishan baqi

gila tu kar na apni aabla-pai ka ro-ro kar

hazaron raste baqi hazaron karwan baqi

abhi se is tarah 'hani' na baiTho mutmain ho kar

abhi to aur bhi dushwar-tar hain imtihan baqi