رہے گی شور نوائی حیات میں کب تک

رہے گی شور نوائی حیات میں کب تک

انا کی زعم گری بات بات میں کب تک

نکل کے دیکھ حصار حد تعین سے

یوں ہی رہے گا اسیر اپنی ذات میں کب تک

حقیقتاً جو نہ کچھ بھی سنیں سنائیں گے

اڑائیں گے وہ ہمیں بات بات میں کب تک

یقیں نہ آئے گا کب تک انہیں محبت کا

رہے گا رابطہ نا ممکنات میں کب تک

دکھائے جائیں گے منظر ہمیں قیامت کے

خیال و خواب یوں ہی رات رات میں کب تک

کہاں ہے کس کے لئے ہے خوشی برائے خوشی

غم حیات رہے گا حیات میں کب تک

سکون قلب کا پہلو رشیؔ بہر پہلو

نظر نہ آئے گا تسخیر ذات میں کب تک