rahguzar shishe ki hai na us ka dar shishe ka hai

rahguzar shīshe kī hai na us kā dar shīshe kā hai

dar-haqīqat apnā hī raḳht-e-safar shīshe kā hai

chaltā phirtā boltā suntā samajhtā hai magar

lagne ko kuchh bhī lage har ik bashar shīshe kā hai

ādam-o-iblīs kā kirdār detā hai sabaq

ḳhair hai faulād kī mānind shar shīshe kā hai

be-sabab Takrāo mat tahzīb ke rasm-o-rivāj

kuchh idhar shīshe kā hai to kuchh udhar shīshe kā hai

vaqt kā patthar to chaknā-chūr kar degā use

ġhaur se dekho zarā zālim kā ghar shīshe kā hai

tujh se pahle TuuT kar bikhre yahāñ kitne 'shafīq'

kyā nahīñ mālūm shohrat kā samar shīshe kā hai

rahguzar shishe ki hai na us ka dar shishe ka hai

dar-haqiqat apna hi raKHt-e-safar shishe ka hai

chalta phirta bolta sunta samajhta hai magar

lagne ko kuchh bhi lage har ek bashar shishe ka hai

aadam-o-iblis ka kirdar deta hai sabaq

KHair hai faulad ki manind shar shishe ka hai

be-sabab Takrao mat tahzib ke rasm-o-riwaj

kuchh idhar shishe ka hai to kuchh udhar shishe ka hai

waqt ka patthar to chakna-chur kar dega use

ghaur se dekho zara zalim ka ghar shishe ka hai

tujh se pahle TuT kar bikhre yahan kitne 'shafiq'

kya nahin malum shohrat ka samar shishe ka hai