رہی دل کی دل میں زباں تک نہ پہنچی

رہی دل کی دل میں زباں تک نہ پہنچی

محبت کی دنیا بیاں تک نہ پہنچی

بسیرا رہا اس کا صحن چمن میں

مگر یہ بہار آشیاں تک نہ پہنچی

انہیں خواب میں بھی نہ دھیان آیا مرا

یہ روح حقیقت گماں تک نہ پہنچی

شب غم مرا دل تھا سولی پہ لیکن

تمنا سر شک رواں تک نہ پہنچی

بہاروں کا تو ذکر ہی کیا کروں میں

گلستان دل میں خزاں تک نہ پہنچی

تصور سے آگے تخیل سے آگے

مرے دل کی وحشت کہاں تک نہ پہنچی

رہی محو طوف چمن برقؔ اکثر

مگر وہ مرے آشیاں تک نہ پہنچی