rahi jo begana-e-mohabbat hayat wo surKH-ru nahin hai

rahī jo begāna-e-mohabbat hayāt vo surḳh-rū nahīñ hai

vo phuul kaisā ki jis meñ shāmil latāfat-e-rang-o-bū nahīñ hai

ye ġhair mumkin hai harf aa.e nizām-e-bāda-kashī pe saaqī

khulā rahegā sharāb-ḳhāna balā se jām-o-subū nahīñ hai

hai merī fitrat niyāz-mandī kamāl terā hai be-niyāzī

mujhe tirī justujū hai lekin tujhe mirī justujū nahīñ hai

ye baat alag hai ki ham nahīñ haiñ sharīk-e-jashn-e-bahār-e-gulshan

vagarna kab is chaman meñ shāmil hamārā rangīñ lahū nahīñ hai

tire ġham-e-jāñ-fazā ke sadqe tirī jafā-e-hasīñ ke qurbāñ

na jaane kyoñ kuchh dinoñ se mujh ko ḳhushī kī ab aarzū nahīñ hai

mirī nigāhoñ se duur rah kar vo mere dil ko jalā rahe haiñ

maiñ kis ko ilzām duuñ batā.ūñ koī mire rū-ba-rū nahīñ hai

ye baat vāzeh jahāñ meñ 'nāsir' ba-qaul-e-mansūr ho ga.ī hai

adā na hogī namāz-e-ulfat agar lahū se vuzū nahīñ hai

rahi jo begana-e-mohabbat hayat wo surKH-ru nahin hai

wo phul kaisa ki jis mein shamil latafat-e-rang-o-bu nahin hai

ye ghair mumkin hai harf aae nizam-e-baada-kashi pe saqi

khula rahega sharab-KHana bala se jam-o-subu nahin hai

hai meri fitrat niyaz-mandi kamal tera hai be-niyazi

mujhe teri justuju hai lekin tujhe meri justuju nahin hai

ye baat alag hai ki hum nahin hain sharik-e-jashn-e-bahaar-e-gulshan

wagarna kab is chaman mein shamil hamara rangin lahu nahin hai

tere gham-e-jaan-faza ke sadqe teri jafa-e-hasin ke qurban

na jaane kyon kuchh dinon se mujh ko KHushi ki ab aarzu nahin hai

meri nigahon se dur rah kar wo mere dil ko jala rahe hain

main kis ko ilzam dun bataun koi mere ru-ba-ru nahin hai

ye baat wazeh jahan mein 'nasir' ba-qaul-e-mansur ho gai hai

ada na hogi namaz-e-ulfat agar lahu se wuzu nahin hai