rahin-e-hasrat-o-hirman-o-yas baiThe hain

rahīn-e-hasrat-o-hirmān-o-yās baiThe haiñ

vo shādmāñ haiñ magar ham udaas baiThe haiñ

kareñ to kaise yaqīñ ham kareñ vafā pe tirī

raqīb ab bhī tire ās-pās baiThe haiñ

vo ek tū ki ḳhud apnī ḳhatā pe ruuTh gayā

par ek ham ki sarāpā sipās baiThe haiñ

kisī kā jaam rahe haiñ kisī kā mai-ḳhāna

ham ek umr se ḳhud ban ke pyaas baiThe haiñ

tumhāre zikr pe jī bhar ke ro.e chillā.e

kuchh aise dil kī nikāle bhaḌās baiThe haiñ

rahin-e-hasrat-o-hirman-o-yas baiThe hain

wo shadman hain magar hum udas baiThe hain

karen to kaise yaqin hum karen wafa pe teri

raqib ab bhi tere aas-pas baiThe hain

wo ek tu ki KHud apni KHata pe ruTh gaya

par ek hum ki sarapa sipas baiThe hain

kisi ka jam rahe hain kisi ka mai-KHana

hum ek umr se KHud ban ke pyas baiThe hain

tumhaare zikr pe ji bhar ke roe chillae

kuchh aise dil ki nikale bhaDas baiThe hain