رہین منت و احسان یار میں بھی ہوں

رہین منت و احسان یار میں بھی ہوں

فریب خوردۂ فصل بہار میں بھی ہوں

مجھے بھی لیتے چلو اپنے ساتھ دیوانو

نثار عظمت زنجیر و دار میں بھی ہوں

سنا ہے رنگ بہاراں نکھرنے والا ہے

یہ دیکھنے کے لئے بے قرار میں بھی ہوں

ادھر بھی دیکھ لے اے ملکۂ بہار غزل

کہ تیری چاہ میں اک دل فگار میں بھی ہوں

ترے خیال کے در پر جبین دل رکھ کر

زمانہ بیت گیا اشک بار میں بھی ہوں

رخ حیات میں نشتر اتارنے والے

یہ سوچ لے کہ ترا رازدار میں بھی ہوں

جہاں پہ صرف محبت کا راج ہے اخترؔ

اسی دیار کا ایک خاکسار میں بھی ہوں