rahin-e-wardat-e-dil hai nayyar shaeri apni

rahīn-e-vārdāt-e-dil hai nayyar shā.erī apnī

murattab kar rahā huuñ maiñ ġhazal meñ zindagī apnī

jhukī hai pā-e-jānāñ par jabīn-e-āshiqī apnī

matā-e-dīn-o-īmāñ ban ga.ī hai kāfirī apnī

na ab vo ahd-e-rangīñ hai na ab vo zindagī apnī

laboñ tak aate aate lauT jaatī hai hañsī apnī

baḌī azmat kī hāmil hai sharāb-e-āshiqī apnī

mai-o-mīnā pe chhā.ī jaatī hai pākīzgī apnī

nigāh-e-yār kā tarz-e-taḳhātub aah kyā kahiye

ḳhabar hone na paa.ī aur duniyā luT ga.ī apnī

yahī masrūr nazreñ jin meñ duniyā-e-masarrat hai

inhīñ masrūr nazroñ ne masarrat luuT lī apnī

udhar hai kufr nāzāñ is taraf īmān nāzāñ hai

ye kis ke āstāñ par hai jabīn-e-bandagī apnī

zarā tū bhī to dekhe dil pe kyā aalam guzartā hai

atā kar de mirī nazroñ ko ik din barhamī apnī

rahin-e-wardat-e-dil hai nayyar shaeri apni

murattab kar raha hun main ghazal mein zindagi apni

jhuki hai pa-e-jaanan par jabin-e-ashiqi apni

mata-e-din-o-iman ban gai hai kafiri apni

na ab wo ahd-e-rangin hai na ab wo zindagi apni

labon tak aate aate lauT jati hai hansi apni

baDi azmat ki hamil hai sharab-e-ashiqi apni

mai-o-mina pe chhai jati hai pakizgi apni

nigah-e-yar ka tarz-e-taKHatub aah kya kahiye

KHabar hone na pai aur duniya luT gai apni

yahi masrur nazren jin mein duniya-e-masarrat hai

inhin masrur nazron ne masarrat luT li apni

udhar hai kufr nazan is taraf iman nazan hai

ye kis ke aastan par hai jabin-e-bandagi apni

zara tu bhi to dekhe dil pe kya aalam guzarta hai

ata kar de meri nazron ko ek din barhami apni