rahna hai bas mujhi ko mere sang dur tak

rahnā hai bas mujhī ko mire sang duur tak

sab se chhiḌī huī hai mirī jang duur tak

ye kaisī dāġh-bel hai ye kaisī niiv hai

aatā nahīñ samajh meñ koī Dhang duur tak

nairangī-e-nigāh ko maiñ apnī kyā kahūñ

manzar tamām lagte haiñ be-rang duur tak

iz.hār-e-dard māñge hai uslūb nit na.e

chaltā nahīñ hai ek hī āhang duur tak

barto ik ek lafz baḌī ehtiyāt se

mā'nī pe chaḌh na jaa.e kahīñ zang duur tak

shabnam meñ haiñ nashāt ke naġhme ghule hue

kohre meñ siskiyoñ kā hai mirdang duur tak

rakh kūcha-e-ġhazal meñ qadam dekh-bhāl kar

sunte haiñ ye galī hai bahut tang duur tak

'vasfī' ye baat sach hai ki dekhā nahīñ abhī

ḳhud ham ne apnī zaat kā aurang duur tak

rahna hai bas mujhi ko mere sang dur tak

sab se chhiDi hui hai meri jang dur tak

ye kaisi dagh-bel hai ye kaisi niw hai

aata nahin samajh mein koi Dhang dur tak

nairangi-e-nigah ko main apni kya kahun

manzar tamam lagte hain be-rang dur tak

izhaar-e-dard mange hai uslub nit nae

chalta nahin hai ek hi aahang dur tak

barto ek ek lafz baDi ehtiyat se

ma'ni pe chaDh na jae kahin zang dur tak

shabnam mein hain nashat ke naghme ghule hue

kohre mein siskiyon ka hai mirdang dur tak

rakh kucha-e-ghazal mein qadam dekh-bhaal kar

sunte hain ye gali hai bahut tang dur tak

'wasfi' ye baat sach hai ki dekha nahin abhi

KHud hum ne apni zat ka aurang dur tak