rahne de taklif-e-tawajjoh dil ko hai aaram bahut

rahne de taklīf-e-tavajjoh dil ko hai ārām bahut

hijr meñ terī yaad bahut hai ġham meñ terā naam bahut

baat kahāñ un āñkhoñ jaisī phuul bahut haiñ jaam bahut

auroñ ko sarshār banā.eñ ḳhud haiñ tishna-kām bahut

kuchh to batāo ai farzāno dīvānoñ par kyā guzrī

shahr-e-tamannā kī galiyoñ meñ barpā hai kohrām bahut

shuġhl-e-shikast-e-jām-o-tauba pahroñ jaarī rahtā hai

ham aise Thukrā.e huoñ ko mai-ḳhāne meñ kaam bahut

dil-shiknī o dildārī kī ramzoñ par hī kyā mauqūf

un kī ek ik jumbish-e-lab meñ pinhāñ haiñ paiġhām bahut

aañsū jaise bāda-e-rañgīñ dhaḌkan jaise raqs-e-parī

haa.e ye tere ġham kī halāvat rahtā huuñ ḳhush-kām bahut

us ke taqaddus ke afsāne sab kī zabāñ par jaarī haiñ

us kī galī ke rahne vaale phir bhī haiñ badnām bahut

zaḳhm ba-jāñ hai ḳhaak basar hai chaak ba-dāmāñ hai 'unvāñ'

bazm-e-jahāñ meñ raqs-e-vafā par milte haiñ in.aam bahut

rahne de taklif-e-tawajjoh dil ko hai aaram bahut

hijr mein teri yaad bahut hai gham mein tera nam bahut

baat kahan un aankhon jaisi phul bahut hain jam bahut

auron ko sarshaar banaen KHud hain tishna-kaam bahut

kuchh to batao ai farzano diwanon par kya guzri

shahr-e-tamanna ki galiyon mein barpa hai kohram bahut

shughl-e-shikast-e-jam-o-tauba pahron jari rahta hai

hum aise Thukrae huon ko mai-KHane mein kaam bahut

dil-shikni o dildari ki ramzon par hi kya mauquf

un ki ek ek jumbish-e-lab mein pinhan hain paigham bahut

aansu jaise baada-e-rangin dhaDkan jaise raqs-e-pari

hae ye tere gham ki halawat rahta hun KHush-kaam bahut

us ke taqaddus ke afsane sab ki zaban par jari hain

us ki gali ke rahne wale phir bhi hain badnam bahut

zaKHm ba-jaan hai KHak basar hai chaak ba-daman hai 'unwan'

bazm-e-jahan mein raqs-e-wafa par milte hain inam bahut