رہنے دیا نہ چین سے لیل و نہار نے

رہنے دیا نہ چین سے لیل و نہار نے

مارا غم حیات و غم روزگار نے

اک کیف پا لیا ہے دل بے قرار نے

پھر گدگدا دیا ہے نسیم بہار نے

جلووں کی تاب لا نہ سکا بزم ناز میں

کھویا خود اعتبار دل بے قرار نے

چھیڑے نہ کوئی میری محبت کی داستاں

کھایا ہے تازہ زخم دل داغدار نے

دنیا کا غم کبھی غم عقبیٰ کبھی رہا

پایا نہ چین میرے دل بے قرار نے

دامن سے ان کے لپٹی کبھی رخ سے جا لگی

کیا کیا مزے نہ لوٹے ہیں مشت غبار نے

اٹھی کبھی نقاب تو کھل اٹھی چاندنی

جلوے بکھیر ڈالے ہیں رخسار یار نے

ملتا جو عمر بھر نہ مجھے وصل یار سے

وہ کیف دے دیا ہے ترے انتظار نے

دنیائے عشق میں وہی ثابت قدم رہا

بخشا جنون عشق جسے تیرے پیار نے

آتا نہیں ہے آج بھی وہ سامنے شفیعؔ

بخشا جہان کو تو اسی پردہ دار نے